ജില്ലാ പഞ്ചായത്തിനു കീഴിൽ ചക്ക വിഭവ കേന്ദ്രങ്ങൾ വരുന്നു

തിരുവനന്തപുരം ജില്ലാപഞ്ചായത്തിൻ്റെ 28 ഡിവിഷനുകളിലും *ചക്കയ്ക്ക് പ്രാധാന്യം നൽകി കാർഷിക മൂല്യവർദ്ധിത സംസ്കരണ കേന്ദ്രങ്ങൾ ആരംഭിക്കും* പ്രകൃതി സ്നേഹിയും വൈദ്യപണ്ഡിത ശ്രേഷ്ഠനുമായിരുന്നശ്രീനാരായണ ഗുരുദേവൻ പുണ്യവൃക്ഷമായി കണ്ട് പ്രാധാന്യം നൽകിയ പ്ലാവിൻ്റെ മഹത്വവും ചക്കയുടെ പ്രാധാന്യവും സമൂഹത്തിൽ എത്തിക്കാൻ ജില്ലാ പഞ്ചായത്തിൻ്റെ നേതൃത്വത്തിൽ സമഗ്രമായ പദ്ധതികൾ ആവിഷ്ക്കരിക്കുമെന്ന് *ജില്ലാ പഞ്ചായത്ത് പ്രസിഡൻ്റ് വി. പ്രിയദർശിനി പ്രഖ്യാപിച്ചു.* പ്ലാവില മുതൽ ചക്കമടൽ വരെ ഉപയോഗിക്കാൻ കഴിയുന്ന രീതിയിൽ ഒരു ചക്ക പോലും പാഴാകാതിരിക്കുവാൻ വിവിധ പ്രസ്ഥാനങ്ങളുടെ സഹകരണത്തോടെ വ്യാപകമായ ബോധവൽക്കരണ പരിശീലന പരിപാടികൾ സംഘടിപ്പിക്കും. ജില്ലാ പഞ്ചായത്തിൻ്റെ 28 ഡിവിഷനുകളിലും *ചക്കയ്ക്ക് പ്രാധാന്യം നൽകി കാർഷിക വിഭവങ്ങളിൽ നിന്നും മൂല്യവർദ്ധിത ഉല്പന്നങ്ങൾ ഉണ്ടാക്കുന്നതിനായി സംസ്കരണ കേന്ദ്രങ്ങൾ* ഈ സാമ്പത്തിക വർഷം തന്നെ ആരംഭിക്കും. ജില്ലാ പഞ്ചായത്ത് കാഞ്ഞിരംകുളം ഡിവിഷൻ്റെ നേതൃത്വത്തിൽ ജാക്ക് ഫ്രൂട്ട് പ്രൊമോഷൻ കൗൺസിൽ (JPC) സഹകരണത്തോടെ ചപ്പാത്ത് ശാന്തിഗ്രാമിൽ നടന്ന ചക്ക ഉൽപ്പന്നങ്ങളുടെ നിർമ്മാണ പരിശീലനം ഉദ്ഘാടനം ചെയ്യുകയായിരുന്നു പ്രസിഡൻ്റ്. ജില്ലാ പഞ്ചായത്ത് മെമ്പർ *ഫ്രീഡാ സൈമൺ* അദ്ധ്യക്ഷത വഹിച്ചു. JPC ചെയർപേഴ്സൻ *റൂഫസ് ഡാനിയൽ* മുഖ്യപ്രഭാഷണം നടത്തി. മില്ലറ്റ് മിഷൻ - കേരള ചെയർപേഴ്സൻ *എസ്. ശ്രീലത ടീച്ചർ* ആശംസാ പ്രസംഗം നടത്തി. ശാന്തിഗ്രാം ഡയറക്ടർ *എൽ പങ്കജാക്ഷൻ* സ്വാഗതവും വൈസ് ചെയർപേഴ്സൺ *ചൊവ്വര അനിൽ* കൃതജ്ഞതയും രേഖപ്പെടുത്തി. ട്രോപ്പിക്കൽ ഫ്രൂട്ട്സ്, വെജിറ്റബിൾസ് & മില്ലറ്റ്സ് ട്രെയിനർ *ആൻസി മാത്യു പാലാ,* ന്യൂജനറേഷൻ കുട്ടികൾക്കും യുവാക്കൾക്കും ഇഷ്ടപ്പെടുന്ന 10 ൽപ്പരം വൈവിധ്യമാർന്ന ചക്ക വിഭവങ്ങളും പ്ലാവില മുതൽ ചക്കമുള്ളു വരെ ഭക്ഷ്യയോഗ്യമാക്കുന്ന വിവിധ മാർഗങ്ങളും പഠിപ്പിച്ചു. സംസ്ഥാനത്തിൻ്റെ വിവിധ ഭാഗങ്ങളിൽ നിന്നും 36 പേർ പരിശീലനത്തിൽ പങ്കെടുത്തു.